Шу кунларда Пўлат Оҳунов умуммуҳолифатни Давра Кенгаши атрофига бирлаштириш ва битта номзод кўрсатиш масаласини жойларга бориб, муҳокама қилмоқда.

Бироқ бирлашишга қарши ўлароқ Бирлик ва Ҳаракат сайтларида жорий июн ойининг ўзида «Эрк» партиясига қарши бир неча мақолалар эълон қилинди. Муҳолифатни сунъий равишда бирлаштиришга, аниқроғи «Эрк» ни ҳовлисининг бир четидаги томорқага айлантиришга жон-жаҳди билан уринаётган БХХП лидерлари, тўйда ҳам, азада ҳам «Эрк» партиясига тош отишдан чарчамаётир. Бу уринишларни қариндош-уруғлар биргаликда қилаётганини кўриб, сиёсатда аҳлоқ бўлиши лозимлигини билишмайди шекилли, деб ўйлайди киши.

БХХП лидерлари Макиавеллининг «сиёсатда аҳлоқсизлик» принципига асосланган ҳаракатини тўхтатармикин? Балки улар эски, коммунистик иллатлардан ҳали ҳам қутула олмаётгандир? Яъни «Биз сиёсат ва аҳлоқни қанчалик аралаштирмайлик бир-бирига қўшилмайди, улар сув ва мой кабидир». ( Коммунист.1990, № 8, 109 бет).

Ҳар қандай тош отишлар, бу ғийбатларга реакция кўрсатмай, мардона чидаб турган М. Солиҳга қанчалик обрў келтирса, тош отаётганларга шунчалик нафрат кўзғатмоқда. «Ғийбат қилиш - биродарининг гуштини ейиш билан баробар» лиги ҳақида оят бор. А.Тоқвил айтганидек, «Эркинлик салтанатига аҳлоқ устунлигисиз эришиб бўлмайди».
(Америкадаги демоқратия. 33-бет)

Инсон Ҳукуклари Умумжаҳон Декларациясининг 1- моддасида «…улар(инсонлар)га ақл ва виждон берилган ва бир бирларига биродарлардек муомла қилишлари даркор» дейилган. А. Пўлатов бошлиқ тош отувчилар М.Солихнинг «Эрк»ни тузиш учун Бирликдан чиқиб кетганини тути каби такрорлашни ҳуш кўрадилар. Партияларнинг ажралиши, янги партияларнинг вужудга келиши нормал сиёсий жараёндир. Энди бу ажралиш зарбидан кейин ўтган 16 йил давомида «Бирлик» ўзини ўнглай ололмаган бўлса, бу ҳаракатда «Бирлик»ни тирилтириш учун хеч ким қолмаганлигини кўрсатмайдими? Бу ҳолда айбни бировга тўнкаш мантиққа тўғри келадими?

Балки бу аччиқ ҳақиқатни билгани учун ҳам Пўлатов «Бирлик»ни регенерацияга ноқобил мажруҳ калтакесакка ўхшатмоқда?

«Эрк»нинг фракциялари ҳақидаги дезинформацияга Пўлатов ва 3-4 та ҳамтовогидан бошқа хеч ким ишонмайди. О. Орифов бошчилик қилаётган мажлисга бостириб кирган, бир гурух ичкиликбозларнинг ҳукумат маблағига вилоятлардан йиғиб келинганини ҳамма яхши билади.

Олға қараб кетаётган одамга ким ҳалақит беради? Албатта орқага томон ҳаракатланаётган одам. БХПП лидерларининг «Эрк» араваси ғилдирагига таёқ суқаётганини кўриб ҳар икки партиянинг бир хилда олға қараб кетаётганига шубҳаланади киши. Уфқ бўйлаб бир томонга ҳаракатланаётган оқ ва қора нуқталар манзилдан узоқлашган сари бир бирига қўшилиб кетади. Биз ҳам шуни истаймиз ва ҳаракатларимизни шу ҳайрли иш ижобий ҳал бўлиши учун сарфлашга тайёрмиз. Аммо бу жараённи сунъий равишда тезлаштирилиши тарфдори эмасмиз. Шунингдек муҳолифатнинг якка умумий номзод билан чиқишига қаршимиз.

Биз сўзимизнинг аввалида иқтибос келтирганимиз, А.Пўлатов «энг камида» деб камситган вариант, яъни умумий номзодлар билан чиқиш тарафдоримиз. Биз бу вариантни энг «аввало» деб атаймиз ва ҳаммани шу вариант тарфдори бўлишга чақирамиз. Шу билан бирга бу вариантдан яхшироқ ва тўғрироқ усул ўйлаб топилса ўшанга қўшилишга ҳам тайёрмиз.

М.Солиҳ «Ким ўз номзодини кўрсатса, кўрсатаверсин. Бу - уларнинг ҳукуқи» деганда шу вариантни назарда тутган деб ўйлаймиз.

Сайловларда қатнашишнинг умумий номзодлар билан чиқиш СТРАТЕГИЯСИ

- Аввало сайловларни бойқот қилмаслик керак. Биз қачон бир ишни эплай олмасак, уни бойқот қилишга устаси фаранг бўлиб кетганмиз. Тўқсонинчи йил бошидаги сайловда ўз номзодини қўя олмаган «Бирлик» уни бойқот қилди. Лекин ўшанда барча виждонли муҳолифатчилар М.Солиҳга овоз берганига ҳеч қандай шубҳа йўқ. 2004 йилдаги Олий Мажлис ва маҳаллий кенгашларга утказилган сайловни, лидерларининг укувсизлигидан вилоятлардаги шаҳобчаларни кувватлантира олмаганлиги туфайли номзод кўрсатишга кўзи етмаганлигидан «Эрк» байқот қилди.

Энди президент сайловларида биронта номзодни рўйҳатга олдира олмасак, бу сайловларни ҳаммамиз баравар ноқонуний деб эълон қилишимиз мумкин. Умид қиламизки, иш бу даражага етиб бормайди.

- Номзод кўрсатишда Ўзбекистон Қонунларига риоя қилишимиз шарт. Шу нарса хисобга олинса, чет элда яшаётган вакилларимиз ўз номзодларини кўрсата олмайдилар.
- А. Пўлатов томонидан олға сурилаётган сайлов қонунларининг «10 йил муқим яшаган» деган бандини ўзгартириш фикри амалга ошмайдиган акция. Бу масалага ёпишиб олсак, фурсатни бой берамиз.

- Умумий бир номзодни ташаббус гурухидан қўйиш ҳам яхши фикр. Бироқ қутурган ҳукумат битта ташаббус гурухини бешигидаёқ ғажиб ташлайди.

- Биз таклиф қилаётган усул шундан иборатки, Ўзбекистоннинг 14 субъектини ҳаммасида ташаббус гурухларини тузишга қиришиш керак. Бу ҳукуматнинг қаршилик кучини бир неча баробар заифлаштиради. Бу ташаббус гурухлардан 14 та номзод кўрсатиш зарур бўлади. Натижада бир нечта вакант уринлар вужудга келади. Бу вариант жуда катта шов-шувга сабаб бўлади ҳамда қаршилик кўрсатилган тақдирда Ўзбекистон ҳукуматининг башарасини жаҳон жамоатчилигига очиб беради. Қонунга кўра ташаббус гурух сони 300 кишидан кам бўлмаслиги керак. Бу 10 минглаб фуқароларни гурухга тортиш имконини беради.
-
Ташаббус гурухларини тузиш шу бугундан бошланиши лозим. Чунки Қонунда бу тадбирни қачон бошлаш кераклиги кўрсатилмаган. Ҳаракатимизнинг маҳсули сифатида 14 тадан битта ташаббускор гурухини рўйҳатга олдира олсак, рўйҳатдан ўта олмаган гурухларимиз субъектлардан имзо йиғиш учун жуда зарур бўлади.

Қолаверса, субъектлардаги бу гурухларимиздан сайлов компанияси давомида мақсадларимизни руёбга чиқаришда фойдаланишимиз мумкин. 14 субъектдан кўрсатиладиган 14 номзод ҳозирдан аниқланиши, бу номзодлар умуммуҳолифатдан, деб тан олиниши керак. Номзодларнинг сайлов дастурлари ҳозирдан ёзилиши ва ташаббус гурухларини тузиш фаолларига тарқатилиши лозим.

Бу ишларни мувофиқлаштириб туриш учун биз ягона сайлов штаби тузилиши керак деб хисоблаймиз ва бу штабнинг аллақачон тузилганлигини маълум қиламиз. Биз бу штабни «ТУРОН халқ сайлов штаби» деб номладик. Бунинг сабаби шуки, муҳолифатдан сайланадиган президент демократик ислоҳотларни амалга ошириш билан бирга, туркий халқларни бирлаштиришни ўзининг мухим вазифаларидан бири деб билишини истаймиз.

«ТУРОН халқ сайлов штаби» аъзолари сайлов қонунларини биладиган, сайловларда суяги қотган, Ўзбекистон ҳукуматининг сайлов компанияларида кўрсатган ва кўрсатадиган найрангларидан ҳабардор кишилардир. «ТУРОН халқ сайлов штаби»нинг қайта ташкиллантириш, янги аъзолар билан тўлдириш ва мувофиқлаштириб туришни лидерларимиз ўз қўлларига олишини илтимос қиламиз.

«Жанубий Давра Кенгашининг раиси»
Абдужалил Рустамов

Ушбу баёнот
2006 йил 8 июнь кунги йиғилишда
тасдиқланган.