| Ўзбекистонда Каримов режими ўзига душман билганларнинг фарзадларини ҳам аямайди. Ўтган 2005 йилнинг май ойида Андижонда содир бўлган хунрезликлардан сўнг расмий Тошкент ҳукумати асосий курашини инсон ҳуқуқлари курашчилари, мустақил журналистлар ва мамлакат ичкарисида қолаётган мухолифат вакилларига қаратди. Қисқа фурсат ичида олдинма кетин Сирдарё ва Қашқадарё вилоятларида, ҳамда Фарғона водийси вилоятларида инсон ҳуқуқлари фаоллари қамоққа ташланишди ва бу ҳол ҳали ҳам давом этмоқда. Ўзбекистон Инсон Ҳуқуқлари жамиятининг Жиззах вилоят бўлими раиси Бахтиёр Ҳамроев нафақат Жиззахда, балки Республика пойтахтида ҳам кўпгина расмий амалдорлар, ҳамда режим тегирмонига сув қуётган бошқа шахсларнинг ғашига тегиб келарди. Маълумотларга кўра, 2 август кунида ҳукумат Бахтиёр Ҳамроев билан ҳисоблашиб қўйиш амалиётини бошлаган. “Кеча 2 август куни Алоқа Технология университетида иккинчи курсида ўқийдиган, 1985 йилда туғилган катта ўғлим Ихтиёр Ҳамроевни қамоққа олишди”, - деб хабар қилади Инсон Ҳуқуқлари ҳимоячиси Бахтиёр Ҳамроев. Ихтиёр Ҳамроев Ўзбекистон Жиноят Кодексининг 277 моддаси “Г” бандида кўрсатилган жиноят – Безорилик содир қилганликда айбланмоқда. Айни дамларгача қўлга киритган маълумотларимизга кўра, шу куни инсон ҳуқуқлари курашчиси Бахтиёр Ҳамроевнинг ўғлини бир груҳ тенгдошлари уриб кетишган. Уни калтаклаганлардан бир нафари ва Ихтиёр Ҳамроевнинг ўзи ҳам енгил тан жароҳати олган. Ихтиёр Ҳамроевни жиззахлик адвокат Ғиёс Намозов ҳимоя қилишга киришганлигини ҳам билдиради Бахтиёр Ҳамроев. Макур ҳодиса тафсилотларини ўрганиш мақсадида Жиззахга, Бахтиёр Ҳамроев хонадонига телефон орқали боғланишга қилган уринишларимиз бирор натижа бермади. Хонадонда мавжуд булган икки телефон рақамлари ҳам узиб қўйилган. Тўлқин Қораев
Ўзбекинфо
| 
