Б. Ҳамроевнинг ўғли Ихтиёр шу ой бошларида безорилик айби билан ҳибсга олинган эди. Инсон ҳуқуқлари халқаро федерацияси Ихтиёрнинг ҳибсга олиниши отасининг ҳуқуқ ҳимоячиси сифатидаги фаолияти билан боғлиқлигини айтиб, Ўзбекистон раҳбариятидан уни зудликда озод этишни талаб қилмоқда.

“Бизнингча, Ихтиёр Ҳамроевнинг ҳибсга олиниши отаси Бахтиёр Ҳамроевнинг инсон ҳуқуқлари ҳимоячиси сифатидаги фаолияти ва ҳукуматнинг унга босим ўтказиш хоҳиши билан боғлиқ”, - деди федерациянинг Марказий Осиё бўйича лойиҳаси раҳбари Александра Кулаева.

Жиззах технология университетининг иккинчи курс талабаси Ихтиёрнинг безориликда айбланишига 23 июль кунги муштлашув сабаб бўлгани айтилмоқда. Ўша куни Ихтиёр нон олгани дўконга чиққанида бир гуруҳ тенгдошлари уни ҳақорат қила бошлаган ва улар ўртасида муштлашув келиб чиққан. Бахтиёр Ҳамроевнинг билдиришича, ўша куни ўғли юзида жароҳат билан уйига қайтган. Муштлашиш пайти Фарҳод исмли йигитнинг ҳам бурни синган. Ўша куни йигитларнинг ота-оналари ва участка милиционери масалани бости-бости қилгандек бўлган. Аммо воқеадан 10 кун ўтиб Жиззах шаҳри ички ишлар бўлими фақатгина инсон ҳуқуқлари ҳимоячисининг ўғлига нисбатан жиноят иши қўзғатган ва уни ҳибсга олган.

А. Кулаева буни инсон ҳуқуқлари ҳимоячисига нисбатан уюштирилган иғво, деб билишини айтади.

”Муштлашиш атайлаб уюштирилган. У ерда жабр кўрган ҳам Ихтиёр. Агар муштлашиш уюштирилмаган, деб ҳисоблаганимизда ҳам бунинг учун Ихтиёрнинг ҳибс этилиши ва унга икки йилдан беш йилгача қамоқ жазоси берилишини назарда тутувчи модда юклатилиши жуда ошиғич чорадир”, - дейди А. Кулаева.

У ҳозир Ўзбекистонда инсон ҳуқуқлари ҳимоячиларига қариндошлари орқали босим ўтказиш анъанаси кучайганини таъкидлади.

“Ўзбекистонда инсон ҳуқуқлари ҳимоячиларига қариндошлари орқали босим ўтказиш усули ҳақида шак-шубҳасиз гапирса бўлади. Кўпгина ҳолларда отаси деб ўғли ёки қариндоши жабр кўришини кузатамиз”, - деди А. Кулаева.

Шуни инобатга олган ҳолда Инсон ҳуқуқлари халқаро федерацияси Ихтиёрнинг зудликда озод этилиши ва ҳуқуқлари кафолатланишини сўраб Ўзбекистон президенти, ташқи ишлар вазири, Олий суд раиси, Бош прокурор ва бошқа ўзбек расмийларига хат жўнатган.

А. Кулаева бундан мақсад Ўзбекистондаги инсон ҳуқуқлари вазиятига халқаро жамоатчилик эътиборини қаратиш эканини билдирди.

“Биз бу мактуб ва мурожаатларимизни БМТ, Европа Иттифоқининг Ўзбекистон билан шартномаси бор барча тузилмаларига жўнатамиз. Бизнингча, ўзбекистонлик ҳуқуқ ҳимоячиларининг овози бўғилаётган бир пайтда бунга жамоатчилик эътиборини қаратишимиз Ўзбекистонда вазият яхшиланишига қаратилган чоралар қўлланиши учун жуда муҳим”, - деди А. Кулаева.