 Намойишчилар Россия прокуратураси қарорини ноқонуний ҳисоблашади
Россия Бош прокуратурасининг Иваново шаҳрида ҳибсда сақланаётган ўн икки ўзбекистонлик ва бир қирғизистонликни Тошкентга қайтариш қарорига қарши Москва ҳамда Оврўпонинг айрим шаҳарларида норозилик пикетлари ўтказилган.
13 кишини Ўзбекистон Бош прокуратураси Андижон хунрезлигига алоқадорликда айблайди. Пикет ташкилотчларидан бўлган Россиядаги "Фуқаровий кўмак" ташкилотининг фаолларидан Елена Рябинина Би-би-си билан суҳбатда, ушбу акциядан мақсад халқаро қонунларга зид бўлган экстрадиция қарорини бекор қилишга эришиш, деб айтган. "Ҳали бу қарор устидан шикоят қилиш имконияти бор. Москвадаги норозилик пикетига ўнтача одам келди, аммо менинг электрон почтамга ўнлаб мактублар келмоқда ва ўзларининг бирдамликларини изҳор этишаётир. Бирлашган Миллатлар ташкилоти ивановолик ўзбекларни халқаро ҳимояга муҳтож инсонлар деб тан олади", деб айтган Елена Рябинина. Шунингдек, Оврўпо мамлакатларида истиқомат қилаётган ўзбекистонликлар Швеция пойтахти Стокгольм, Дания пойтахти Копенгаген шаҳарларидаги Россия элчихоналари қаршисида норозилик намойишлари уюштирганлар. Намойишчилар "Бирлик" халқ ҳаракати партияси" фаоллари ва Андижон воқеаларидан сўнг Ўзбекистонни тарк этишга мажбур бўлган инсон ҳуқуқлари ҳимоячилари ва оддий фуқаролар бўлганлар.
| 
