Баёнот
Бугун Туркманистон умрлик диктатор Сапармурод Ниёзов ўлимидан сўнг ўз тарихидаги масъулиятли дамларни кечирмоқда.
Бу Туркманистон халқига мамлакатдаги вазиятни ўзгартириш, демократия ва тараққиёт йўлини танлаш учун очилган тарихий имкониятдир.
Биз, Ўзбекистоннинг сиёсий муҳолифати ва туркманларга биродар бўлган ўзбек халқи, шундай бўлишидан, Туркманистон тепасига, демократик Туркманистонни қуришга тайёр бўлган янги одамлар келишидан умидвормиз.
Шундай шахслар мамлакат ичида ҳам, ҳорижий элларда юрган туркман муҳолифати сафларида кўплаб топилади. Улар учун бугун, ўз халқлари ҳаётини, бамаслаҳат яхши томонга буриш учун ноёб имконият етилди.
Биз Туркманистондаги ҳозирги ҳокимиятни мамлакатда демократик ислоҳотлар қилишга – эркин демократик сайловларни таъминлашга, сиёсий маҳбусларни озод қилишга ва Ниёзов ҳукмронлиги даврида мамлакатни тарк этган муҳожирларни ватанларига қайтишларига имкон яратишга чақирамиз. Биз АҚШ, Россия ва барча халқаро жамоатчиликни Туркманистондаги демократик ўзгаришларни қўллаб қувватлашга чақирамиз. Туркманистондаги воқеа нафақат шу мамлакат, балки бутун марказий осиё минтақаси учун, шунингдек дунёдаги энг золим диктаторлардан бири бошқараётган бизнинг мамлакатимиз учун ҳам аҳамиятлидир. Мухаммад Солиҳ Ўзбекистон миллий нажот Қўмитаси раиси,Ўзбекистон “Эрк” демократик партияси лидери
|
