МХХ одам зотининг ғийбатни яхши кўришини билади.Ва ишини айнан шу заиф нуқтадан бошлайди,режим душманлари ҳақида ёлғон фактларни ўзининг агентлари воситасида омма ичига ёяди.Бу дезинформацияни ёлғонсевар кимсалар - худди ўлаксахўр қузғунлар каби - илиб олиб,халқ ичида тарқата бошлайдилар.Бу ўлаксахўр кимсалар, - МХХнинг маошсиз ишлайдиган кадрлари, - илҳом билан ишлайдилар,чунки бировни ғийбат қиларкан лаззатланадилар,бировга туҳмат қиларкан бахтиёрликдан шайтонлаган аёл каби ҳушдан кетадилар.

Афсуски,бу даҳшатли гуноҳдан узоқ туришга қодир бўлганлар озчиликда.Бу озчилик - Оллоҳдан қўрққанлардир.Оллоҳдан қўрққанлар бу дунёда оздир.

Бу даҳшатли гуноҳга ўртоқ бўлмаслик учун ғийбат уялари бўлган ўзбекча сайтларни ўқимайман ва сафдош биродарларга ҳам ўқимасликни тавсия этаман.Аммо яқинда сафдош укалардан бири баъзи туҳматларга жавоб беришим кераклигига мени ишонтирди.Чет элга чиқиб, руҳий мувозанатини йўқотиб қўйган баъзи кишилар кимнинг ким эканлигини билмайдилар ва интернетда чиққан ҳамма нарсани ҳақиқат сифатида қабул этадилар,уларга тўғри йўлни кўрсатиш ҳар бир мусулмоннинг бурчи алабатта.

Каминага ва ташкилотимизга қорабўёқ чаплаётганлардан биттаси бизнинг грант олиб буни халқ учун эмас,ўз эҳтиёжларимизга ишлатаётганимизни айтади, аммо бу грантни қаердан олганимизни кўрсатмайди,чунки исботи йўқ. Исботи йўқ,чунки ЭРК партияси ҳеч кимдан грант олгани йўқ.

Мухолифат номидан гапириб,туҳмат санъатида шайтонга дарс бериш даражасига етган иккита махлуқ бор.Улар сайт очиб,тўрт тарафига заҳар сочмоқдалар,аммо ўз заҳридан ўзи ҳалок бўлишларини хаёлига келтирмайдилар.

Булардан биттаси “Бирлик” харакати номини булгаб, каминанинг ҳукуматдан 2 та квартира олган деган туҳматни йилларча тарқатаяпти.Бу телбанинг кимлигини яхши биласизлар.Унинг интернетда очган сайтига қаранг,халқнинг дардига оид бирор мақола топаолмайсиз.Уни ва укасини Каримов 1996 йилдаёқ Ўзбекистонга қайтишига ижозат берган,аммо қайтмаяптилар,нега?

Каримов менга уй бермади,уйларимни олди, буни бутун халк билгани каби,фасодчи пасткашлар ҳам билади.

Ҳолбуки,уларининг уйи ҳам мусодара қилингани йўқ,қариндошлари ҳам қамалгани йўқ,нима сир бор бу ерда?

Мухолифатга алоқаси бўлмаган ҳолда,мухолифатчиман деб танитиб юрган яна бир кимса бор.Мафиячидан пул олиб, уни алдаб кетган бу фирибгар 1991 йилда Олий Кенгашда депутат бўлиб, Каримовга қарши гапирдим дея,қаҳромонликка даво қилиб юрибди Америкада.Аслида эса,1991 йилда Каримовнинг ўрнини олишни режалаштирган Шукрилла Мирсаидов Олий Мажлисдаги депутатларга мансаб тарқатар экан, бу фирибгар депутатга ҳам бир суяк ташлаганди."Энди Каримов ишдан кетадиган бўлди" дея севиниб,унга қарши гапириш журъатини кўрсатган номуссиз нусха эди у.Номуссиз,чунки Мирсаидов енгилгандан кейин Каримовнинг пойига тиз чўкиб, этагини ялаб,ундан "президент консултанти" мақомини олган нусха бу.Энди бу кимса шу даражага етдики,,каминанинг оиласини яхудий дейшгача борди бу одам.Бундай пасткашликни қандай кечириш мумкин?

Унинг ЭРК партияси пинжига кириб партиянинг пулларини ўғирлагани,машинасини сотиб егани ҳақидаги тафсилотларни бошқалар айтиб берар бир куни.

Унинг бу тубанликларини билганимиз учун бизга кини бор ва бутун ифлос ҳаркатларига мотор ҳам ўша кин.

Ўтган ойларда Даврон Шарипов тахаллуси билан мақолалар ёзган бир мухолифатчини каминага иснод қилганидан ҳам хабарингиз бор.Ҳолбуки,бу тубан кимса менинг доим ўз номим билан ёзганимни билади.

Эсиз инсонлик!

Бу бахтиқора кимсларга ачиниш мумкин холос.Айни пайтда бу бебахт кимсаларнинг мағзавасига чаноқ тутиб,мухолифат вакиллари орасида баҳс-мунозорани жонлантираман деб ўйлаётган яхшиниятли хаёлпарастларга ҳам ачинаман.

Ўзбекнинг дардини,унинг зулмга қарши нима қилиши мумкинлигини таҳлил этган мақола ёки баҳслар бўлса бошқа гап. Фақат ва фақат мағзава,фақат ва фақат ғийбат ва фитна - шуми сиз билган сўз эркинилиги,шуми сиз тасаввур қилган демократия ва плюрализм!?

Бу билан нафақат юқоридаги фитна усталари,уларнинг мақолаларини чоп этаётган сиз ҳам Каримовнинг мақсадларига хизмат қилаётганингизни англаш пайти келмадими?

Камина ва сафдошларимиз бу курашимизни Оврупога келгандан кейин бошламадик.

Қайта қуриш "курашишга имкон" бергандан кейии ҳам бошламадик.

Биз бу курашни халқмизнинг энг қора кунларида,турғунлик йилларининг энг қоронғи кечаларида бошладик.

На Оврупо бор эди атрофда,на-да фитначиларнинг тилларида достон бўлаётган лаънати грантлар! На-да Ўзбекистон тахтида ўтирган бу Золим,на-да,унинг коммунист гумашталари - бугун ўзини мухолиф атаётган пасткашлар!

Фақат қалбимизда ёнган бир оташ - бир ватан севгиси бор эди ва Номус!

Шунинг ўзи етарли эди:қора рўйхатга тушишдан қўрқмаслик учун,умр бўйи таъқиб қилинишга рози бўлиш учун,юртдан сургун бўлиш учун,халқ ичида хоин деб ном олиш ва ва ҳатто ватангадо бўлишдан қўрқмаслик учун шунинг ўзи етарли эди бизга.

Ҳа,Номус!

Масжидларимизнинг қуббаларидаги ой ва юлдузни коммунистлар ўроқ ва болғага айлантираётганда бунга қарши овоз чиқариш учун номусли бўлиш керак эди. Опа-сингилларимизнинг бошидаги рўмолларни юлиб олаётган атеистларга "тўхта" дейиш учун номусли бўлиш керак эди.Бегуноҳ қамалаётган ўзбек деҳқони ҳимоясига сўз айтиш учун,ерларимизнинг вайронага айлантиришига, аёлларимизнинг Москва тарафидан қисирлаштириш сиёсатига қарши чиқиш учун номусли бўлиш керак эди.

Бугун ҳам Золимнинг хизматидаги шайтонбаччаларга қарши курашда,фитна ва туҳмат ботқоғига ботиришга уринаётган махлуқларга қарши гапириш учун озгина номус керак.

Умрида бир чўпни бир ердан олиб,бошқа ерга қўймаган нусхалар,оғзингизни юминг,андишанинг отини қўрқоқ қўйманг!

Муҳаммад Солиҳ