Тўлқин ҚОРАЕВ, Швеция

Ўзбекстонда Президент сайлови! Алол оқибат, мамлакатнинг “оқил” ва “доно”, “узоқни кўра билувчи” яккаю ягона президенти Ислом Абдуғани ўғли ўз ўзини яна бир бор президентликка сайлайдиган бўлди. Бошқача бўлиши ҳам мумкин эмас албатта.

“Ўзбекистоннинг ўз йўли бор” - деган эди Ислом Каримов ҳокимиятда даврон сурган кезларида ва унинг йўли эса, мамлакат аҳлини қирғин қилиш, уларнинг ҳақ- ҳуқуқларини поймол қилиш бўлиб чиқди. Боз устига, Ислом Каримовдек одамхўр дунёда ўз гумашталарига ҳам эга. Россия ва Хитой каби гегимон давлатлар бугун ўзбек халқи душманини қўллаб-қувватламоқда, худди, яқин ўтмишда АҚШ қўлаб-қувватлагани каби.

Мамлакат иқтисодий кризис ботқоғида ва ундан чиқа олмайди. Чунончи, нарх-навонинг ўсиши, аҳоли ялпи даромадининг камайиши, иш ўринларининг камлиги, инсон ҳақларининг қўпол бузилиши, ўзбек пахтаси ва газининг сув текинга сотилиши, келажак соҳиблари бўлган ёш авлоднинг пахта далаларида азобли меҳнатга жалб қилиниши ва кўплаб омиллар ҳозирданоқ айтмоқдаги - Ўзбекистон тугайди!

Мамлакат президенти бир умр ҳокимиятда қолишни истайди ва ундан сўнг эса унинг набиралари ҳокимиятда даврон суришлари керак. Хўш, Ўзбекистон халқининг шу кунларгача тобу тоқати етармикан? Йўқ албатта! Аммо халқимизнинг ҳар қандай хўрликка бўлсин, сабру бардоши етишига ишончим комил. Чунончи, ҳозиргача давом этиб келаётган қусур, халқимизнинг мардикорлик қилиши, бу ҳам етмаганидек қулликга ҳам сабр бардош қилганлиги, қизларимиз дунё кезиб фоҳишалик қилаётганлиги – буларнинг ҳаммасига халқимиз чидаб келмоқда. Ўзбекнинг ўзлиги бу бўлмаса керак албатта. Бугунги даврда ватандошларимиз бир парча нонга ҳам қаноат ҳосил қиладилар ва ҳеч вақт ўз раҳбарларининг юзига тик қарамайдилар. Бу бизнинг сифатимиз, хислатимиз ва айни мана шу хислатар сабаб, ўзбек дунёда хор бўлмоқда. Кўзингизга қаранг, хорижда одамлар семириб кетаяпман деб ўзини овқатдан тиймоқда, қайсики сиз Ватанда ейишга нон топа олмаяпсиз.

Қизиқ, нега Ислом Каримов ва унинг гумашталари бир парча нонга қаноат қилмайдилар? Ахир улар ҳам ўзбекмиз дея кўкрак керадиларку. Нега МХХ ва милицияда ишлайдиган ўзбеклар халқнинг бунчалик хўрланишига тоқат қиладилар ва ўзлари ҳам уни хўрлашда иштирок этадилар? Балки улар ҳам ўзбек эмасдирлар? Афсуски, биз ҳаммамиз ўзбеклармиз. Дўст ҳам ўзимиз ва душман ҳам ўзимиз!

Ўзбеклар ва Ўзбекистонликлар! Мамлакат қисмати шу экан, у яқин-яқинларда батамом тугайди ва сиз ҳам, бугун амал-мансабларда ўтирган кимсалар ҳам қочоқларга айланасизлар. Сизлар ҳам турли мамлакатларга бориб бошпана сурайсизлар. Чунки Ватан тугаса сизга янги ватан керак булади. Қамоқхонларда ҳақни талаб қилганларга, озодликда бўлсин, кўнгли ўксиб яшаётганларга қарата ўқ отаётган жаллодлар, халқни қийнаётган фикри тўмтоқлар, ўйланг, эртанги кунингиз нима бўлишини ўйланг. Сизлар сиғинаётган даҳо Ислом Каримовни ҳам бир куни ажал домига тортар. Ундан сўнги бошланадиган фуқаролик конфликтларига ўралашиб қолишингиз, сизнинг ҳам яқинларинги ўлиб кетишларини тасаввур қилинг! Чунки Ўзбекистон тугамоқда. Мамлакатда қаттол тузум ўрнатган қонхўр фақат ўзбекнинг қонини ичмоқда. У эса тугуб бораяпти. Мана шу тугуб бораётган Ватанда “қонхўрга хизматкор бўлдим” деган унвон билан хорижда Ватан қила олмайсиз. Бундай эҳтиёж эса яқин-яқинларда пайдо бўлади. Чунки Ўзбекистон тугамоқда.

Халқаро ташкилотлар йўл қўймайди деган хаёлга бориш ҳам нотўғридир. Улар мамлакат ички ишларига аралаша олмайдилар. Йирик мамлакатларни эса Ўзбекистон табиий бойликлари қизиқтиради. Унинг қул бўлиб ишлаётган халқи эвазига сотиб олинадиган арзон баҳо пахтаси, гази қизиқтиради. Бас, шундай экан, улардан ҳам нажот кутиш ноўриндир. Албата савол туғилади: нима қилмоқ керак? Мана шу саволга тўғри жавоб топиб амал қилмоқ керак! Хукмдорга хуш ёқиш учун бировни ёмонотлиғ қилиш, лаганбардорлик қилиш, ўзи бўлар деб муаммоларга эътиборсиз қараш ўзбекни ўлдиради ва Ўзбекистонни тугатади.

Олдина эса сайлов. Ҳукмдорингиз тағин ўзини қайта сайлашига шубҳа йук албатта. Чунки у бу ўриндан кета олмайди. Нафақат ҳокимият касалига чалинганлиги учун, балки қилган жиноятлари учун жавоб беришидан қўрқади. Шунинг учун ҳам кетмайди. Ўзига ўхшаган диктаторларнинг қандай ўлим топганлигини, халқнинг қарғишига қолиб номи лаънатлар остида қолиб кетганлигини билади у ва билган сайин оёқлари қалтирайди. У билан бирга Ўзбекистон ҳам тугайди! Агар диктаторга қарши курашмас эканмиз, мамлакатни ҳам бой берамиз.

Олдинда сайлов! Азиз Ватандошлар! Сайловларда иштирок қилманг ва овоз берманг. Ҳақиқат учун курашга отлана олмас экансиз, жилла қурса сайловларда иштирок қилмаслик билан Ислом Карим режимига қарши эканлигингизни очиқланг. Етар энди “мен норозиман, лекин норозилигимни ҳукумат билиб қолмасин” деб яшамоқ. Сайловларни байкот қилинг ва қарорингизни дунё жамоасига билдиринг. Акс ҳолда ҳукуматингиз сизнинг номингиздан Ислом Карим “ҳазратлари” учун овоз бериб қўяди.

Карл Маркснинг “Капитал” деб номланган асари “Бутун дунё пролитарлари, бирлашингиз!” деган хитоб билан якун топган ва бу хитоб етмиш йилдан ортиқ яшаган Совет ҳукматининг алвон байроқларидаги шиор эди. Бугун биз сизларни, яъни бутун дунё ўзбекларини “Бутун дунё ўзбеклари, бирлашингиз!” дея бирлашишга чақирамз. Акс ҳолда ҳар бирингиз якка ҳолда жалод қўлидаги қурбонларга айланасиз.