| Юсуф Расул, Қувғиндаги ўзбек ижодкорлари Уюшмаси раиси, журналист, Швеция. Бугун кўп кишилар Ўшда отиб ўлдирилган журналист Алишер Соиповнинг жасорати ҳақида ёзмоқда. Унгача нима бўлганди?
Ўлимига қадар баъзи сайтлар Алишер ҳақида туҳмат ва бўҳтон тўла мақолалар чиқаришган. Масалан Ўзбекистон Миллий Хавфсизлик Хизматига алоқадорлиги айтиладиган gazeta.uz, press-uz.info каби интернет нашрларда Алишерга очиқдан очиқ ўзбек халқининг душмани, ҳукуматга қарши фаолият олиб бораётган журналист, “Хизбут Таҳрир”, “Ўзбекистон Исломий ҳаракати” аъзоси дея таъриф берилган эди. Алишерга қарши бўҳтон компаниясида “Демократик Ўзбекистон Конгресси” ҳам иштирок этгани бугун маълум бўлмоқда. uzbekcongress.org да эълон қилинган кўп сонли материалларда Алишерга гоҳ АҚШ , гоҳ қирғиз махсус хизматлари жосуси, гоҳ Ўзбекистон Исломий Ҳаракати, гоҳ “Хизбут Таҳрир” аъзоси, гоҳида эса “Эрк” демократик партиясининг жанубий Қирғизистондаги вакили дея таъриф берилади. Бу хилдаги мақолалар бир вақтнинг ўзида gazeta.uz, press-uz.info сайтларида ҳам пайдо бўлганди. Шундай мақолалардан бири билан қуйидаги линк орқали танишишингиз мумкин: http://turonzamin.com/2007/09/17/media АҚШда рўйхатдан ўтган, Ўзбекистонда демократия қарор топиши учун кураш олиб бориши керак бўлган бу ташкилот сайтида нега Қирғизистонлик ўзбек журналистига қарши мақолалар эълон қилинди ёки улар бошқа сайтлардан кўчириб қўйилди? Бунинг ортида ДЎКнинг қандай мақсадлари ётибди? Бугун тарқатилган маълумотларга кўра Қирғизистон омбудсмани Турсунбой Бакир ули журналист Алишер Соиповга уюштирилган суиқасд ташкилотчиси Ўзбекистон махсус хизматлари эканлиги аниқланганини маълум қилган. Бу суиқасднинг тайёрланишида, журналист дўстимизни жамоатчилик кўзи ўнгида ёмонотлиқ қилишда www.uzbekcongress.org саҳифаси раҳбариятининг ҳам ҳиссаси йўқми? Балки суиқасдни тайёрланишига маънавий кўмак бергани учун ушбу ташкилот раиси Жаҳонгир Маматовни ҳам судда жавобгар сифатида жалб қилиш керакдир? Дунёдаги кўзга кўринган инсон ҳақлари ва журналистларни ҳимоя қилиш ташкилотлари бу борада ўйлаб кўрадилар деган умиддадимиз. Марказий Осиёда журналистлар жуда қийин вазиятда ишлаб турган пайтда, уларга қарши диктатор Каримов малайлари қаторида туҳмат ва бўҳтон компанияларини уюштириш ёки шундай компанияларда қатнашиш нақадар тубанлик эканлиги ва бу ҳолат қанчалик оғир оқибатларга олиб келишини Алишер Соипов мисолида кўриб турибмиз. Бу - ҳар қандай сўз ва матбуот эркинлиги принципларига ва журналистика этикасига зид бўлган ҳолатдир.
| 
