Илгариги хабарларимиздан ҳам маълумки, 16 июнь кунида Ёдгор Турлибековнинг уйига келган 30 нафар милиция ва МХХ ходимлари томонидан унинг уйида сақланаётган инсон ҳуқуқлари адабиётлари ва компьютер техникаси, ҳамда инсон ҳақлари бузилишига оид тўпланган материаллар ҳам олиб кетилганди. Ўзбекистон Жинояд Процесуал Кодекси қоидаларига кўра, тергов идоралари қамоққа олинган шахсга уч ичда (72 соат) айблов эълон қилишлари шарт. Айни қоидага амал қилаётган Қашқадарёлик терговчилар инсон ҳуқуқлари курашчисини аввал қамоққа олиб энди уни айблаш учун уч кундан бери тинимсиз меҳнат қилишмоқда.

Ишни олиб боаётган терговчи Тўлқин Ёрматов айни кунларда Ёдгор Турлибековнинг компьютерида битилган исм фамилиялар ва мавжуд аризалар асосида рўйхат тузган. Айни мана шу рўйхатга номи кирганлар бирма бир терговга чақиртирилмоқда. Дўқ пўпса ва “йўқотиб юбораман”лар асосида олиб борилаётган сўроқ амалиётига асосан Қашқадарё вилоятидан Ўзбекистон Инсон Ҳуқуқлари жамиятига аъзо бўлиб кирганлар чақиртирилмоқда. Жумладан, инсон ҳуқуқлари ҳимоячисининг уйида сақланган барча аризалар ҳам айни дамда тергов томонидан ўрганилмоқда.

“Нима учун давлат рўйхатидан ўтмаган ташкилотга аъзо бўлдинглар деб сўрашди, - дейди ўз номи ошкор қилинишини истамаган манба, - тағин грантлар қанча бўлганлиги ва қаердан, қай вақтда олинганлиги билан қизиқишди”.

Респондентимиз келтирган маълумотларга кўра, тергов томони ҳозирда чақиртирилганлардан тушунтириш хати ёздириб олишмоқда. Ташкилот аъзолиги учун ариза берганларнинг эса имзолари шу усулда текширилмоқда ҳам.

Қашқадарёда инсон ҳуқуқлари курашчиларига қарши аёвсиз кураш бошланди. Бундан ким омон чиқади, ҳозирча номаълум.

Тўлқин Қораев. Мустақил журналист. Швеция.
“Узбек инфо”