Ўзбекистон “Эрк” Демократик партияси котибияти рахбари Дилором Исҳоқова, «Бирлик» халқ ҳаракати ичидаги фитначилар томонидан тарқатилган Дилором Исҳоқова ва ва бу партия таркибидаги “Мазлум” инсон ҳуқуқлари ташкилотининг раиси Аъзам Тургуновларнинг Эрк партияси сафини “тарк этишга тайёрланмоқдалар” деган миш мишларни қатъиян рад этди.

- Бу қип қизил бўхтондан бошқа нарса эмас. Мен ҳеч қачон «Эрк»дан чиқаман деб ҳаракат қилмаганман ва ўла ўлгунимча шу партия сафида қоламан, - деди у «Uzbekinfo»нинг Швециядаги мухбири билан суҳбатда.

Шунингдек партия котиби Дилором Исҳоқова, “Мазлум” инсон ҳуқуқлари ташкилотининг раиси Аъзам Турғуновнинг “Эрк”дан чиқаётгани ҳақидаги миш мишлар ҳам “Эрк” партиясини обрўсизлантиришга қаратилган фитнанинг давомидир дея таъкидлади.

- Балки кейинги кунларда соғлиғимнинг мазаси бўлмай касалхонага ётқизилганлигим ва сиёсий фаолиятимнинг сустлашгани бундай миш мишларнинг тарқалишига асос бўлгандир. Лекин, ўйлаб кўринг бу иғвони тарқатишдан кимга фойдаю кимга зарар? Бу ҳизматлари учун Каримов аллақачон Абдураҳим Пўлатовга орден бериши керак эди...

Дилором Исҳоқовага кўра, бу каби миш мишларни тарқатишдан фақат ҳаракатдаги мухолифат фаолиятига рахна солишга уринаётган кучлар наф кўради. Бу муҳолифатнинг ўз мақсадларидан чалғишига олиб келади.

Шунингдек, у партиянинг бошқа бир собиқ аъзоси Холдор Вулқон билдирган баёнотга ҳам изох билдирди.

- Холдор Вулқон аслида бундан бир неча йил илгари Партия сафидан чиқарилган. Бу ҳақда 2003 йил ёзилган мажлис баёни ва котибиятнинг махсус қарори бор. Фақат унинг орадан бир неча йил ўтиб қилаётган ҳаракати сабабини баҳолаш жуда қийин.

Бугун Ўзбекистон ичида туриб ўз сиёсий фаолиятини давом эттираётган “Эрк” Демократик партияси котибияти рахбари Дилором Исҳоқова, шунингдек, партия фаоллари бугунги кунда кўпроқ инсон ҳуқуқлари масаласи билан шуғулланаётганишаётгани. Бу фаолият ҳам кўп ҳолларда осон кечмаётганини таъкидлади.

- Бугун муҳолифат сафларининг емираётган биз билмаган кўп синоатлар бўлиши мумкин. Шу нарса аниқки биз шафқатсиз давр синовидан ўтаяпмиз. Бир кун келиб бу сиёсат ўзгариши муқаррар. Бугун Муҳаммад Солиҳ етакчилик қилаётган муҳолиф “Эрк” партиясининг аксарият аъзолари шу кунларга ёруғ юз билан етиб боришига ишонаман, - деди Дилором Исҳоқова.

Uzbekinfo.org, Қудрат Бобожон