Уюшма Низоми лойиҳаси юзасидан ўтган вақт мобайнида йиғилиб қолган фикрлар муҳокама этилиб Уюшма ҳужжатларига аниқлик ва ўзгартиришлар киритилди. Ҳусусан, уюшма атамасидаги “Қувғин” сўзига аниқлик киритилиб, бу атама нафақат жисмонан мамлакатдан қувғин қилинган, балки мамлакат ичкарисида туриб ҳукумат қувғинига учраган, яъни асарлари тақиқлаб қўйилган, ижод имкониятлари чекланган, турли тазйиқларга учраган ижодкор ва санъаткорларга ҳам таалуқли экани таъкидланди.

- Ижодкор цензура ҳукмрон мамлакатни ихтиёрий тарк этган бўлиши мумкин, ўз ихтиёридан ташқари мамлакатда бир тутқун каби яшаётган аммо, унинг ижоди чеклаб қўйилган бўлиши мумкин. Ўзбекистон қамоқхоналарида ўтирган ижодкорлар ҳам бундан мустасно эмас. Юқоридаги барча ҳолатларда ижодкорнинг қувғин бўлгани англашилади, - деди уюшма ташкилотчиларидан бири, бугун Канадада яшаётган ёзувчи Исмат Хушев.

Қувғиндаги ўзбек ижодкорлари Уюшмасини қўллаб қувватлаш истагини билдирганлар, жумладан, таниқли туркшунос олим Боймирза Ҳайит, машҳур ҳофиз ва шоир Дадахон Ҳасан, ўзбек модерн адабиётининг таниқли намояндаси, шоир Муҳаммад Солиҳ, Туркиядаги Коч Университети рахбари, тилшунос олим Темур Хўжа ўғли, шоира Дилором Исҳоқова, журналист Носир Зокир, шоир Холдор Вулқон ва бошқалар бир овоздан Уюшма аъзолигига қабул қилинди.

Уюшмага шунингдек 90 йилларнинг бошларида мамлакатни тарк этишга мажбур бўлган, ҳозир Москвада жойлашган “Ўсарфильм” киностудияси асосчиси Имомбек Абдусаидов қабул қилинди. У йиғилишдан сал олдинроқ бу ташкилотга аъзо бўлиш истагида эканини билдирган эди. Шу куни Уюшма "Рауф Парфи" мукофотини таъсис этишга қарор қилди.

- Бу уюшманинг йиллик мукофотидир. Айнан Рауф Парфи номи билан аталишининг сабаби бор. Чунки шоир ўз умри ва ижоди давомида таъқиб ва тазйиқларга дучор бўлган. Бундан ташқари у ўзбек замонавий шеъриятида инқилоб ясаган буюк шахсдир. Рауф Парфи мукофоти дунёда таъқибга учраган бошқа халқлар ижодкорларига ҳам берилиши кўзда тутилган. – деди уюшма раиси, журналист Юсуф Расул.

Қудрат Бобожон,
мустақил журналист, Швеция.