| “Фарғона.Ру” агентлиги бунгача хабар берганидек, Қирғизистон жанубидаги Ўш шаҳрида Ўзбекистон ҳокимияти томонидан 2005 йилнинг 13 майидаги Андижон исёнида итирок этишда айбланиб, қидирилаётган беш нафар Ўзбекистон фуқароси қўлга олинган. Қирғизистон ҳокимияти қўлга олинганларни республика ҳудудида ноқонуний равишда юрганликда, ўқ-дори сақлаш ва қалбаки паспортлардан фойдаланишда айбламоқда. Чамаси, А.Юлдашевнинг қизи Ўшда кўпдан буён яшаётган бўлган. Робия Акрам Юлдашевнинг катта қизи бўлиб, унинг бир ярим яшар қизчаси ҳам бор. Ҳозир Робия Ўш шаҳар Ички ишлар бошқармасининг вақтинчалик сақлаш изоляторида ўтирибди. Унинг фарзанди ва синглиси Муҳаррам эркинликда, улар милиция томонидан қўлга олинган уйда туришибди. Шунингдек, қўлга олинган беш ўзбекистонликдан бири Рустам Собитовнинг БМТ ҚиБОК ваколатхонаси ва Ўш шаҳар Миграция ва бандлик қўмитасида бошпана излаётган шахс сифатида рўйхатга олингани ҳам аниқланди. Куч қўллаш тизимлари ходимлари Ўш шаҳрида Акрам Юлдашевнинг қизлари топилгани ва улардан бири ҳибсга олингани тўғрисида айтишмаяпти. Ўш шаҳар ИИБ томонидан тарқатилган хабарда ҳам ҳибсга олинган андижонликларнинг олтинчиси бўлган Робия тўғрисида айтилмаган. Робия, Муҳаррам ва қолган ўзбекистонликлар яқин кунларда Ўзбекистон махсус хизматларига ўтказиб берилиши мумкин. Фарғона.Ру
|
