Тошкентда мусулмонларни ҳибсга олиш бўйича навбатдаги оммавий кампания бошланди. Uzbek Refugee activist тарқатган дастлабки маълумотларга кўра, сўнгги вақтда 12 киши қўлга олинган. Уларнинг барчасига Ўзбекистон Жиноят кодексининг «Диний экстремистчи, сепаратчи, фундаменталчи ва бошқа таъқиқланган ташкилотларни тузиш, уларга раҳбарлик қилиш ва иштирок этиш» деб номланган 242-2 моддаси бўйича айблов қўйилмоқда. Бу модда мусулмонларга қарши репрессиялар ўтказиш учун асосий қурол ҳисобланади. Қўлга олинганлардан бирининг адвокати Тошкент ички ишлар бошқармасининг бўлимида бир неча қўлга олинган мусулмонларни кўрган. Манбанинг маълум қилишича, қўлга олинганларнинг барчасини БМТ Қочоқлар иши бўйича Бош комиссари бошқармаси ёрдамида Европа мамлакатларидан бирига кетиб қолган таниқли ўзбек имоми Обидхон қори Назаров ҳамда ўтган йилнинг ноябрида Жанубий Қозоғистон вилоятида қўлга олинган таниқли ўзбек имоми Руҳиддин Фахриддинов билан алоқа қилганликда гумон қилишмоқда. Р. Фахриддиновни ўзбек ҳокимияти конституцион тузумини ўзгартириш ва таъқиқланган диний ташкилотга раҳбарлик қилишда айблашга уринмоқдалар. Шуниси қизиқки, қўлга олинганлардан ҳеч ким Руҳиддин Фахриддиновни кўрмаган ва у билан бирор марта учрашмаган. Бугунга кунга келиб қуйидаги ҳибсга олинган мусулмонларнинг исми-шарифлари маълум: Маҳкамов Илҳом Комилович – 1972 йилда туғилган. Тошкент шаҳри, Собир Раҳимов туманидаги Сағбон кўчасида, Алоҳида торкўчасида яшайди. Маҳкамов Илҳом 31 март куни соат 17.30 ва 18.00 ўртасида ўз автомашинасида Сағбон кўчасида кетаётган эди. Уни «Жигули-07» автомашинасида йўл четига қисиб боришиб, шу кўчада жойлашган автосервис ёнида тўхтатишган. «Жигули-07» автомашинасидан фуқаро кийимидаги спортчилардек кўринишдаги 4 нафар эркак тушиб, Маҳкамовнинг қўлларига кишан солишган ва номаълум томонга олиб кетишган. Бир қанча вақт ўтгач, ана шу одамлар келиб Маҳкамовнинг автомашинасини олиб кетишган. Бу ҳолатни шу яқин орада турган бир неча киши: унинг қўшнилари, дўстлари ва танишлари кўришган, бироқ улардан ҳеч ким бу ишга аралаша олмаган. Ҳозир Маҳкамов Ўзбекистон Ички ишлар вазирлиги изоляторида ўтирибди. 2006 йилнинг 29 мартида Тошкент шаҳар аэропортида яна бир мусулмон, Халқаро иқтисодиёт ва дипломатия университети талабаси бўлган Дониёр Магдаазимов қўлга олинган. Ўша куни у Мисрга, ўқишга кетиши керак эди. Университет ўзининг 15 талабасини талабаларни алмаштириш дастурига кўра 10 ойга Мисрга жўнатаётган эди. Бироқ Дониёр аэропортда чегарачилар томонидан қўлга олиниб, номаълум томонга олиб кетилган. Ўша куниёқ кечқурун унинг Қорақамиш 2Ў4 даҳаси, 60-уйдаги 25-квартирасига милиция ходимлари кириб келишиб, унинг китоблари ва компьютерини ундаги маълумотлар билан бирга олиб кетишган. Ҳозирги пайтда Дониёрнинг қаердалиги ноъмалум. Эртаси куни, 2006 йилнинг 30 мартида Дониёр яшаган маҳаллада яна 4 нафар мусулмон ҳибсга олинган. Уларнинг ҳар бирини қўлга олиш сценарийлари бир хил бўлган. Ўша куни уларнинг барчаси ишда эдилар. Ички ишлар вазирлиги ходимлари уларнинг ишдан қайтишини кутиб туришиб, кўчада қўлга олганлар. Қўлга олинган тўрт кишининг исми-шарифлари: Ҳусанов Зоир – 1966 йилда туғилган, Қорақамиш 2/4 даҳасидаги Дониёр яшаган 60-А уйда яшаган, «Ўрикзор» улгуржи бозорида бўёқ сотиш билан шуғулланган. Мақсудов Анвар – 1966 йилда туғилган, оилали, икки фарзанди бор, каттаси 7-синфда, кичиги 1-синфда ўқийди, бир хонали квартирада яшаган, автомашиналар тўхташ жойида қоровул бўлиб ишлаган. Яшаган манзили: Қорақамиш 2/4 даҳаси, Юнусов кўчаси, 2-уй, 77-квартира. Ибрагимов Носир – 1965 йилда туғилган, оилали, икки фарзанди бор, яшаган манзили: Чуқурсой даҳаси, 17-уй, 13-квартира. Тоиров Абдуғофир – 1969 йилда туғилган. Яшаган манзили: «Мойқўрғон» маҳалласи, мебель дўконида сотувчи бўлиб ишлаган. Ўз уйида ўтирганда ҳибсга олинган. Эртаси куни ана шу мебель дўконида ишлаган Жамшид, Мирпўлат, Ҳожиакбарлар ҳам қўлга олинганлар. Уларнинг фамилиялари ва манзиллари аниқланмоқда.