2006 йилнинг 19 апрель куни соат 18.00 да Ўзбекистоннинг Тошкент вилояти Зангиота туманидаги Янгиобод қишлоғи ҳудудида ўзбек чегарачилари наряди вақтинчалик тўсиқнинг тиканли симини ўғирлаб кетишга уринаётган уч номаълум шахсни кўриб қолишади. Бу ҳақда бугун АПН-Қозоғистон агентлиги маълум қилди. Қўлга олиш ҳаракатлари пайтида қонунбузарлар чегарачиларга қаршилик кўрсатишиб, Қозоғистон ҳудудида яширинишган. Бир қанча вақт ўтгач, Қозоғистон томондан чегарани бузган ҳолда 20-25 киши одам келиб, ўзбек чегарачиларини тошбўрон қила бошлаган. Ўз хавфсизлигини таъминлаш ва низони бостириш мақсадида чегарачилар осмонга қараб ўқ узишган. «Қонунбузарлар ноқонуний ҳаракатларини тўхтатмасдан чегарачилар билан муштлаша кетишган. Натижада қонунбузарлардан бири, Қозоғистон фуқароси Бауржан Аҳмедов бошидан жароҳат олган», - деб таъкидлади Ўзбекистон Миллий хавфсизлик хизматининг Давлат чегарасини қўриқлаш қўмитасининг матбуот хизмати. Аҳмедов Ўзбекистон ҳудудида касалхонага ётқизилган, чегара хизматлари бошлиқлари эса жанжални ўрганиб чиқиш тўғрисида келишиб олишди.
|