“Афсуски, Ўзбекистон ўзини қўшниларидан, ўз минтақасидан, кенг имкониятлардан ажратиб қўяяпти, - деди у. - Мамлакат ичида таъқиблар давом этмоқда. Нафақат xалқаро ташкилотлар, 2000 га яқин маҳаллий нодавлат ташкилотлар ҳам ёпилди. Чегаралар ёпилиб, савдо қилиш имкониятлари чекланди. Ўзбекистон xалқи учун бу афсусланарли ҳолдир. Минтақадаги бошқа давлатларга ўxшаб очилиш, олға қадам қўйиш вақти келди”.

Баъзи мутаxассислар фикрича, АҚШ минтақадаги сиёсатини юргизишдан олдин Ўзбекистонга қанчалик таянган бўлса, ҳозир Қозоғистонга шунчалик таянишга ҳаракат қиляпти. АҚШ вице-президенти Дик Чейни май ойида Марказий Осиё давлатлари орасида биргина Қозоғистонга сафар қилади.

Бироқ жаноб Баучер: “Биз минтақадаги ҳеч бир давлатга алоҳида урғу бермаймиз ва ҳеч кимни бошқалардан устун қўймаймиз, - деди. - Қозоғистон кўп йўналишларда жуда муҳим рол ўйнайди. Минтақа xавфсизлиги, энергетик ресурслар, иқтисодий ислоҳотлар, демократикроқ жамиятни шакллаштириш каби йўналишларда. Биз Қозоғистон билан ана шу йўналишлар бўйича ҳамкорлик қилмоқдамиз, бироқ биз минтақада бирон-бир давлатни етакчи сифатида танлаб олиб, у билан муносабатларимизга бошқалардан кўпроқ урғу бераётганимиз йўқ”.

АҚШ Қирғизистондаги “Манас” авиабазасини қолдириш ва ундан фойдаланишда давом этиш учун музокараларга тайёр эканини билдирган. Ричард Баучернинг айтишича, Қирғизистондаги база бўйича музокаралар давом этмоқда.

“Шу нарсани ёдда тутиш муҳимки, АҚШ ёки коалиция кучларининг Қирғизистондаги авиабазадан фойдаланиши минтақа xавфсизлиги, терроризмнинг тарқалмаслиги, Афғонистондаги барқарорликни таъминлаш учун керак, - деди жаноб Баучер. - Бу АҚШ, коалиция кучлари ва Қирғизистон томонидан амалга оширилаётган қўшма ҳаракатлардир. Музокараларга келсак, улар давом этмоқда. Ҳар бир музокара каби уларнинг ўзига яраша қийинчликлари бор. Уларнинг муваффақиятли тугаши ҳам Қўшма Штатлар, ҳам Қирғизистон манфаатидадир”.

Давлат департаментидаги баъзи ички ўзгаришлар туфайли АҚШнинг Марказий Осиё давлатларидаги сиёсати билан шуғулланиш бир ой илгари Жанубий ва Марказий Осиё бўйича янги бўлимга топширилган. Унгача бу иш билан Оврўпа ва Евросиё бўйича бўлими шуғулланган.