Андижонда 9-май хотира ва қадрлаш куни муносабати билан маросим ўтказилди. Тантанали маросим Андижон вилоят ҳокимлигининг янги биноси олдида, шоир З. М. Бобур ҳайкали ўрнатилган бош майдонда бўлиб ўтди. Маросимда уруш ва меҳнат фахрийлари, иккинчи жаҳон ва афғон урушида қурбон бўлганларнинг яқинлари, корхона ва ташкилотлардан вакиллар, шаҳар ва вилоят ҳокимлиги мутасаддилари иштирок этдилар. Маросим қатнашчилари шу кунларга эсон-омон етиб келганликларига шукрона келтириб, бу кунларга етмаганлар ҳаққига дуо қилдилар. Элу- юрт хизматида ҳаёт кечириб кўз юмган, иккинчи жаҳон ва афғон урушида ҳалок бўлганларнинг хотираси ёдга олинди. Ўтганлар хотираси учун бир минут сукут сақланди. Шунингдек Бобур ҳайкали пойига ҳамда Мотамсаро она ҳайкали пойига гулчамбарлар қўйилди. Аммо маросимда 2005 йили 13 май куни ҳалок бўлган андижонликлар хотираси ёдга олинмади. Эслатиб ўтамиз, ўтган йили 13-май куни Андижонда минглаб намойишчилар ҳукумат кучлари томонидан ўққа тутилган. Воқеалар асосан шаҳарнинг Бобур номли бош майдонида кечган. Айрим маълумотларга кўра, Бобур ҳайкал атрофига ҳам ўликлар дафн этилган бўлиши мумкин. Расмий маълумотларга кўра, икки юзга яқин киши террорчилар томонидан ўлдирилган. Ҳуқуқ ҳимоячиларига кўра, 13 май куни ҳукумат ўқидан минглаб намойишчилар ҳалок бўлган. Фарғона.Ру
|