Бугун 6 нафар ўзбекистонлик қочқин БМТ Қочқинлар иши бўйича Олий Комиссарлигининг Ўшдаги ваколатхонаси ёнида Андижон воқеаларига бир йил тўлиши муносабати билан намойиш ўтказди. Бу ҳақда “Америка Овози” радиосининг ўзбек хизмати маълум қилди. Қочқинлар “Ўзбек халқим, Андижон қонини унутма!”, “13 май унутилмайди”, “Stop! Dictator Karimov!”, “Бирлашган Миллатлар Ташкилотидан Каримов режимига қарши босим кучайтирилишини талаб қиламиз” шиорлари билан намойишга чиққан. Андижон воқеаларидан кейин кўплаб ҳуқуқ ҳимоячилари ва мухолифатчилар ҳукумат тазйиқлари остида Ўзбекистонни тарк этмоқдалар. 13 май воқеаларининг бир йиллиги арафасида ўзбекистонлик 4 нафар қочқин бошпана сўраб, БМТ Қочқинлар иши бўйича Олий Комиссарлигининг Ўшдаги ваколатхонасига ва қирғиз расмийларига мурожаат қилган. Қочқинлар ўтказган намойиш ярим соат давом этган. Эртага Бишкек шаҳрида “Аср шами” нодавлат ташкилоти ташаббуси билан Ўзбекистон элчихонаси биноси қаршисида Андижон қурбонлари хотирасига бағишланган намойиш ўтказилиши режалаштирилган.
|