 Мухолифатдаги "Эрк" демократик партияси раиси Муҳаммад Солиҳ кеча Стокгольм аэропортида ҳибсга олинган ва бугун қўйиб юборилган. Интерполдан билдиришларича, Муҳаммад Солиҳ Ўзбекистон ҳукумати халқаро қидирув эълон қилган ўзбек фуқароларининг янги рўйхатига асосан ушланган. Айни дамда Муҳаммад Солиҳ Британия парламенти аъзолари ва инсон ҳуқуқлари гуруҳлари билан учрашиш учун Лондонга учаётир. У ўзи сиёсий бошпана олган Норвегиянинг расмий ҳужжатлари билан сафар қилаётган бўлган. Муҳаммад Солиҳга нисбатан Интерполнинг ҳибсга олиш буйруғи биринчи марта 2001-йил декабрида Прагада қўлланилган эди. Ўшанда Прага маҳкамаси Ўзбекистон томонининг экстрадиция ҳақидаги сўровини рад этган ва Муҳаммад Солиҳни ҳеч қандай айбсиз маҳкама залидан озод этган. Ўзбекистон ҳукумати "Эрк" демократик партияси раҳбарини 1999-йилги Тошкент портлашлари ва бошқа қўпорувчилик ҳаракатларида айблаб, сиртдан ўн олти ярим йиллик қамоқ жазосига маҳкум этган. Аммо Бирлашган Миллатлар Ташкилоти Ўзбекистон ҳукумати қўйган айбларни сиёсий, дея рад этган ва Солиҳга сиёсий қочқин мақомини берган. Андижон қирғинидан сўнг Муҳаммад Солиҳ Ўзбекистоннинг дунёвий мухолифати раҳбари сифатида Вашингтон ва Лондонда қабул қилинган. Ҳибсга олинишидан аввал Оврўпо Иттифоқи парламентида чиқиш қилган Муҳаммад Солиҳ жаҳон ҳамжамиятини Ўзбекистондаги демократияни қўллаб-қувватлашга чақирган. Швеция расмийларига кўра, Муҳаммад Солиҳнинг қўлга олинишида "қандайдир англашилмовчилик юз берган".
| 
