Ўзбекистон мустақил ҳуқуқ ҳимоячилари ташаббускор гуруҳининг матбуот хизмати берган маълумотга кўра, 2006 йилнинг 30 майида Жиноий ишлар бўйича Тошкент вилоят судининг шикоятлар бўйича коллегияси Тошкент вилоят судининг 2006 йилнинг 6 мартида Мўътабар Тожибоевага нисбатан чиқарган қарори бўйича аниқлама чиқариб, аввал қабул қилинган қарорни ўз кучида қолдирди.

Эслатиб ўтамиз, фарғоналик ҳуқуқ ҳимоячиси, “Ўтюраклар клуби” минтақавий ҳуқуқни ҳимоя қилиш ташкилоти раҳбари саккиз йилга озодликдан маҳрум қилинган эди.

Кузатувчилар, адвокатлар ва ҳуқуқ ҳимоячилари М. Тожибоевага нисбатан жиноий иш қалбаки ва сиёсий асосга эга деб ҳисоблайдилар. 2005 йилда М. Тожибоева халқаро Нобель мукофоти номинанти сифатида кўрсатилган эди.

Суд жараёнини АҚШ, Буюк Британия, Германия, Швейцария элчихоналари ва ОБСЕ вакиллари, Ўзбекистондаги чет эллик журналистлар, турли гуруҳ ва жамиятлардаги ҳуқуқ ҳимоячилари кузатиб турдилар.